*

克服三大障礙 沈祖堯與師生 捱夜睇世界盃

中文大學新校長沈祖堯未上任,就搞出新民主女神像的「大頭佛」,不過這位「親民校長」不會坐以待斃,趁世界盃決賽荷蘭惡鬥西班牙,周一凌晨在「百萬大道」跟師生校友一齊坐地下睇波,絕對是大學校長的創舉。

據聞這條「橋」由沈祖堯自己提出,但中大政治與行政學系高級導師蔡子強指,沈祖堯平日好少睇波,今次更要克服三大障礙,第一,他向來早睡早起,清晨六點起身工作,但周日晚就無得早瞓;第二,他好怕熱,八百人迫在「百萬大道」,都咪話唔辛苦;第三,他跟蔡子強都是人到中年,腰骨唔多唔少都有問題,要坐地下睇波睇兩個鐘,肯定腰痠背痛,沈校長真是用心良苦!

中大在「百萬大道」豎立巨型屏幕,沈祖堯破天荒與八百名師生校友一齊睇波,又投入到吹「烏烏祖拉」助興。